وخذ مثلاً.. شخص ما يكتب علي صفحته أي كلام مثل: "الجو بارد جداً".

المكعبات الأولي في التعليق تنتمي لمدرسة الأفورة الصارخة:
- ألف لايك يا كبير ... لخصت الحالة بعبقرية ..

مكعبات مدرسة المزايدة الغامضة علي غرار:
- برد جدا؟! أنتوا لسه شفتو حاجة ...

مدرسة خُلقت لأعترض:
- برد؟ وجدا؟ أنتو عايشين في جو غير اللي احنا عايشين فيه ولا ايه!

مدرسة شكل للبيع:
- والله ما حدش طلب من حضرتك تقعد فيها، مش عجباك سيبها وبالف سلامة

مدرسة التربص الموضوعي الحذر:
- يعني ما سمعناش صوتك لما كان الجو تحفة طول الشهور اللي فاتت

مدرسة التفاؤل بأي حاجة والسلام:
- ياريت نبص للنص المليان في الموضوع ونبطل النظرة التشاؤمية دي شوية ...

مدرسة الحكيم الذي لا يخطئ:
- عشان تبطلوا جدال ومعافرة وتصدقوني لما قلتلكم اننا هنشوف ايام بيضا

مدرسة أبناء المهجر:
- اشمعنا الجو اللي هيبقي عدل، ربنا يطلعنا من البلد دي علي خير بقي

مدرسة تبرير وتمرير أي أمر واقع:
- ياريت بس وانت بتقول كده تحمد ربنا ان الجو هنا احسن من سيبريا والاسكيمو!

مدرسة اللي علي راسه بطحه:
- ياريت ما نغلطش في البلد اللي اتربينا وعشنا فيه، ونبطل حقد وتشويه رموزه شويه !

مدرسة الجدية الدائمة والفيسبوك مش للهزار:
- واستفادنا ايه لما عرفنا انك بردان، واضاف ايه ده للأمة ..

فتقرر تشد اللحاف، وتمتنع عن الكلام المباح.. وتبرد من سكات وما تتشاركش حاجة أحسن!